Beli Maškari

"Beli Maškari"
Od davnine su po Drazi,
hodili beli maškari,
zamaškarani muški, va belo,
na glavi klobuk i dva črljeni facola,
va ruci šćap i jaka volja.
I danas, kroz Dragu, za vrime mesopusta
gredu beli maškari i ženske s njima.
Od Gonara pa sve do Gula,
muški va belo, ženske va nošnji od dote,
mladi i mlada, na čelu kolone,
tancajuć uz mih i barjak,
kako da se ženu,
stari i mladi, svi za njima krenu.
Na svakih par sto metri, čeka ih stol,
vino, rafijoli, rakija i frite
i sve ono ča spremu ljudi,
da su maškare site.
Uz pismu i tanac,
zahvalu se svima,
pasaju celu Dragu,
unako kako se i prije hodilo,
i na kanati, čita se štivo.
Ča se dogodilo kroz godinu,
ono ča je Drazi bilo, za narugat se.
Karaju se Dolinac i Gorinac,
vajk se prepiru, rastresaju Drašku satiru.
I fala Bogu da to dura,
da se ne zaboravi.
Za vrime mesopusta,
bez belih maškari,
Draga bi bila pusta...
J.G.